Proqramlar, Dərs vəsaitləri, Məqalələr, Tövsiyələr, Soruşun cavab verək
Ümumi orta təhsil pilləsi (V-IX siniflər) üzrə şagird:
Plan
1. Ədəbiyyat proqramlarının
xüsusiyyətləri
2. Ədəbiyyat dərslikləri və
dərs vəsaitləri
3. Ədəbiyyat fənn kurikulumu
XXI əsrin başlanğıcı
pedaqoji elmlərdə, o cümlədən ədəbiyyat tədrisində yeni metodik təfəkkürün bərqərar
olması, yeni inkişaf meyillərinin, ideyaların yaranması və tətbiqi ilə əlamətdardır.
Ədəbiyyat təliminin məzmununa yeni
yanaşma ilk növbədə təlim-tərbiyə prosesinin humanistləşdirilməsi, təlimin
differensiallaşdırılması, inteqrativ metodika yeni dərs texnologiyalarından
istifadə, tədrisin elm və mədəniyyətin
müasir səviyyəsinə çatdırılması, fəal,
interaktiv təlim metodlarının sistemli tətbiqi, kurikulum ideyalarının düzgün
reallaşdırılması, alternativ dərslik və vəsaitlərin yaradılması ilə bağlıdır.
Müasir məktəbdə ədəbiyyat tədrisinə
yeni yanaşmanın mahiyyəti bədii əsərin şagird - oxucuya mənəvi, estetik, və
emosional təsirinin gücləndirilməsi, həyati
bacarıqların aşılanmnası, şagirdlərdə müstəqilliyin, özünüdərkin tərbiyə
olunması, oxucu qavramasının, mütaliəyə, ədəbiyyatın öyrənilməsinə marağın
inkişafı, təlimə yaradıcı münasibətin formalaşdırılmasını nəzərdə tutur.
Ədəbiyyat fənninin məzmunu
və strukturu Təhsil Nazirliyinin işçi qrupunun işləyib hazırladığı V-XI siniflər
üçün ədəbiyyat proqramında öz əksini tapıb. 2003-cü ildən ümumtəhsil məktəblərində
tətbiq olunan həmin proqram əsasında hazırlanmış yeni nəsil ədəbiyyat dərslikləri
son illərdə şagirdlərin ədəbi təhsilinin məzmununa və təşkilinə öz müsbət təsirini göstərmişdir.
Ədəbiyyat kursunun məzmunu şagirdlərin ədəbi təhsili, tərbiyəsi
və inkişafı vəzifələri, həyat təcrübəsi, maraq dairəsi, ədəbiyyat tarixi
haqqında zəruri biliklərin formalaşdırılması əsasında müəyyənləşdirilmişdir.
Kursun quruluşu isə söz sənətinin mahiyyətinin, xüsusiyyətlərinin başa
düşülməsi, şagirdlərin ədəbi, mənəvi-estetik inkişafının təmin edilməsi
baxımından əsaslandırılmışdır.
Təlim fənni kimi ədəbiyyat fənninin məzmununu keçmiş və müasir dövrün dəyərli söz sənəti nümunələrinin, görkəmli ədiblərin
həyat və yaradıcılığının, tarixi-ədəbi prosesin mühüm faktlarının (ayrı-ayrı
dövrlərdə ədəbiyyatın inkişaf meyilləri, ədəbi cərəyanlar, ədəbi mübarizələr və
s.), bədii əsərin dolğun şəkildə mənimsənilməsi üçün zəruri olan ədəbiyyat nəzəriyyəsi
elementlərinin öyrənilməsi təşkil edir. Şagirdlərin şifahi və yazılı nitqinin
inkişafı üzrə işlər ədəbiyyat fənninin üzvi tərkib hissəsidir.
V-XI siniflərin «Ədəbiyyat» proqramında ədəbiyyat fənninin
məqsəd və vəzifələri müəyyənləşdirilərkən milli ədəbiyyatımız, mədəniyyətimiz,
ənənələrimiz əsas götürülmüşdür. Proqramda deyilir ki, ədəbiyyat fənninin ali
məqsədi yüksək ideya-bədii dəyərə malik əsərlərin öyrənilməsi əsasında şagirdlərin
dünyagörüşünü genişləndirmək, mili və ümumbəşəri mənəvi dəyərləri mənimsətmək,
nəticə etibarilə onların vətənpərvərlik ruhunda tərbiyə olunmalarına kömək etməkdir.[1]
Ədəbiyyatın məktəbdə öyrənilməsi zamanı şagirdlərdə
ədəbi-bədii zövqün sinifdən-sinfə keçdikcə, tədricən formalaşdırılması diqqət
mərkəzində saxlanılır. Bu prosesdə şagirdlərin mütaliə ilə bağlı xüsusi
bacarıqlara yiyələnməsi böyük əhəmiyyət kəsb edir. Proqramda belə bir cəhət əsas
götürülmüşdür ki, bədii mətnin oxunması, qavranılması və qiymətləndirilməsi məhz
bu bacarıqların mövcudluğu şəraitində
mümkündür.
Təlimin bütün pillələri
arasında varisliyin gözlənilməsi bədii əsərlərin oxusu və təhlili üzrə
bacarıqların formalaşdırılmasında mühüm şərtdir. Proqramda XI sinfi bitirən
şagirdlərdə müxtəlif dövrlərdə və janrlarda yazılmış bədii əsərləri oxumaq, estetik
hadisə kimi qavramaq və təhlil etmək bacarığı formalaşdırılması vəzifəsi qarşıya
qoyulmuşdur. Ədəbi təhsilin bütün pillələrində bədii mətnin oxusu və təhlili
üzrə bacarıqların yaradılmasının zəruriliyi qeyd edilsə də, ayrı-ayrı siniflərdə
hansı bacarıqlar üzrə iş aparılacağı konkretləşdirilməmişdir.
Şagirdlərin ədəbi inkişafı əsas
etibarilə ədəbiyyatdan müxtəlif məşğələlərdə bədii əsərlərin oxusu və təhlili
vasitəsilə həyata keçirilir. Şagirdlər ədəbi-nəzəri biliklərə yiyələnir, söz
sənəti nümunələrini oxumağı, ideya-bədii məzmununu dərk etməyi, qiymətləndirməyi
öyrənirlər.
Orta məktəblərdə şagirdlərin
ədəbi təhsili üç pillədə həyata keçirilir:
1.
İbtidai təhsil (I-IV siniflər)
2.
Ümumi orta təhsil (V-IX siniflər)
3.
Tam orta təhsil (X-XI siniflər)
Şagirdlərin ibtidai siniflərdə
ədəbi təhsili ümumi orta təhsil pilləsi üçün zəmin rolunu oynayır. Bu pillədə məktəblilərin
mütaliə mədəniyyətinin, nitqinin inkişafı, söz sənəti haqqında ilkin elementar
biliklərə yiyələnməsi üzrə iş aparılır. İbtidai siniflərdə qazanılmış ədəbi
bilik və bacarıqlar nəzərə alınmaqla şagirdlərin bədii əsərləri emosional
qavraması növbəti təhsil pilləsində inkişaf etdirilir, oxucu təcrübəsi artırılır.
Ümumi orta təhsil pilləsində
(V-IX siniflər) ədəbiyyatın müstəqil fənn
kimi öyrənilməsinə başlanır. Məktəblilər müxtəlif mövzu və janrlarda əsərlərlə
tanış olur, ayrı-ayrı sənətkarların həyatı, yaradıcılığı, ədəbiyyatşünaslıq
terminləri, bədii təsvir və ifadə vasitələri haqqında məlumat əldə edirlər.
V-IX siniflər müstəqil təlim
pilləsi olmaqla yanaşı, tam orta təhsil pilləsində ədəbi-tarixi kursun öyrənilməsi,
şagirdlərin daha mürəkkəb, irihəcmli əsərləri, ədəbi-nəzəri məsələləri qavraması,
ədəbi bilik və bacarıqlarının dərinləşdirilməsi və inkişafı üçün zəmin
yaradır.
V-VII siniflərdə proqram
mövzuları tematik prinsip üzrə (Vətən
sevgisi, ana məhəbbəti, ana dünyası, müharibə və insan taleyi və s.) müəyyənləşdirilmişdir.
Təhsil Qanununa uyğun olaraq icbari təhsilin IX sinifdə bitməsi VIII-IX siniflərin
proqram və dərsliklərinə fərqli yanaşmanı şərtləndirmişdir. Belə ki, ümumi
orta təhsili başa vuran şagirdlərin qədim dövrlərdən bu günədək ədəbiyyatımızın
inkişaf yolu, qüdrətli nümayəndələrinin yaradıcılığı barədə müəyyən sistemli
biliklərə yiyələnməsi zərurəti meydana çıxır. Odur ki, VIII-IX siniflərdə proqram
mövzuları əvvəlki siniflərdən fərqli olaraq tarixi-ədəbi prosesin
inkişaf məntiqinə uyğun müəyyənləşdirilmiş,
ayrı-ayrı sənətkarların həyat və yaradıcılığı nümunəsində ədəbiyyatımızın qədim
dövrdən üzü bəri inkişaf yolu izlənilmişdir.
Tam orta təhsil pilləsində
(X-XI siniflər) ədəbiyyat tarixi-ədəbi prinsip əsasında tədris edilir, qədim
dövrlərdən bu günədək ədəbiyyatımızın ən dəyərli nümunələri monoqrafik və
icmal mövzuları vasitəsilə öyrənilir. Tədrisinə ayrıca saat ayrılan monoqrafik
mövzular qüdrətli sənətkarların həyat və yaradıcılığının öyrənilməsinə həsr
olunur. Məsələn, “X sinifdə “M.F.Axundzadə” monoqrafik mövzusu sənətkarın həyatını,
yaradıcılığının, “Aldanmış kəvakib” povestinin, “Hekayəti - Müsyö Jordan və
dərviş Məstəli şah” pyesinin ayrıca dərs saatlarında öyrənilməsini nəzərdə
tutur. Şagirdlər müxtəlif dövrlərdə yaşamış sənətkarların yaradıcılığı, bədii
əsərləri ilə tanış olmaqla ədəbiyyatımızın
tarixini, inkişaf xüsusiyyətlərini öyrənirlər.
Yuxarı siniflərdə keçilən icmal
mövzular ədəbiyyat tarixinin ayrı-ayrı mərhələlərinə həsr olunur. Ədəbiyyat proqramında Azərbaycan ədəbiyyatının
tarixi aşağıdakı dövrlərə bölünmüşdür:
1. Qədim dövr (ən qədim
zamanlardan XIII əsrə qədər)
2. Orta dövr (XIII əsrdən
XVII əsrə qədər)
3. Yeni dövr (XVII əsrdən
XX əsrin əvvələrinə qədər)
4. Ən yeni dövr (XX əsrin əvvəllərindən
bu günə qədər)
İcmal mövzuları şagirdlərə hər
dövrün sosial-mədəni mənzərəsi, ədəbiyyatın inkişaf meyilləri, özünəməxsus cəhətləri,
görkəmli nümayəndələri barədə biliklərə yiyələnməsini təmin edir. Beləliklə, məktəb
ədəbiyyat kursunun bir-birindən təsrid olunmuş əsərlərin öyrənilməsinə
çevrilməsinin qarşısı alınır. Müxtəlif dövrlərin qarşılıqlı əlaqəsini,
yazıçıların yaradıcılığının özünəməxsusluğunu, onları bir-birinə yaxınlaşdıran
ideyaları, ədəbi prosesin inkişafındakı varisliyi aydınlaşdıran icmal mövzuları
məktəb ədəbiyyat kursunun tamlığını, bütövlüyünü təmin edən vasitə yerində
çıxış edir.
İcmal mövzuları monoqrafik
mövzuların öyrənilməsi üçün zəmin yaradır. İcmal və monoqrafik mövzular
bir-biri ilə qarşılıqlı əlaqədə öyrənilir, biri digərini tamamlayır, məktəb ədəbiyyat
kursunun əsasında duran nəzəri məsələlərin (bədii yaradıcılıq metodu, ədəbi
cərəyanlar, söz sənətinin özünəməxsusluğu və s.) öyrənilməsini təmin edir.
Şagirdlərin nitq inkişafı
üzrə işlərin aparılması ədəbiyyat kursunda mühüm yer tutur. Nitq inkişafı üzrə
işlər şagirdlərdə bədii sözə həssas münasibət aşılanması, sözün, fikrin məna
incəliklərini duymaq, ifadə etmək bacarığının, nitq mədəniyyətinin formalaşdırılmasını nəzərdə tutur. Sənətkarın
sözdən istifadə məharəti, obrazlı sözün ifadəliliyi, sərrastlığı, fikir
tutumu, yığcamlığı haqqında aydın təsəvvür
yaradılması nəticə etibarilə şagirdlərin şifahi və yazılı nitqinin inkişafına
gətirib çıxarmalıdır.
Məktəb ədəbiyyat kursunda ədəbiyyat
nəzəriyyəsinin öyrənilməsinə xüsusi diqqət yetirilir. Ədəbiyyat nəzəriyyəsinə dair biliklər konkret proqram mövzuları
ilə əlaqədə mənimsənilir. Bu zaman ədəbi-tarixi prosesin inkişaf meyilləri,
öyrənilən materialın ideya-məzmunu, bədii xüsusiyyətləri nəzərə alınır. Bədii
mətnlərin oxusu, təhlili zamanı ədəbi-nəzəri biliklərin tətbiqi nəticəsində əsərin
ideya-bədii məzmunu dərindən qavranılır, yazıçı sənətkarlığı haqqında dolğun
təsəvvür yaradılır. Sinifdən-sinfə keçdikcə şagirdlərin qavrama səviyyəsi nəzərə
alınmaqla ədəbiyyat nəzəriyyəsi üzrə bilik və bacarıqlar mürəkkəbləşdirilir və
dərinləşdirilir.
Proqramda ədəbiyyat
kursunda öyrənilən bədii əsərlər üç
qrupa ayrılır:
1.
Ədəbiyyat dərslərində öyrənilən, mətni üzrə təhlil
aparılan əsərlər. Bu əsərlər proqramda ayrıca mövzu kimi göstərilir, tədrisinə
saat ayrılır.
2.
Sinifdənxaric oxu üçün tövsiyə olunan əsərlər. Bu əlavə
oxu materialları müvafiq proqram mövzuları ilə əlaqədar olub, şagirdlərin sənətkarın
yaradıcılığı, mövzu, problem üzrə bilik
və bacarıqlarını dərinləşdirmək məqsədini izləyir. Təlim materiallarının öyrənilməsi
zamanı həmin əsərlər üzrə də iş təşkil edilir.
3.
Müstəqil sinifdənxaric oxu üçün əsərlər. Bu əsərlərin
sinifdənxaric oxu dərslərində müzakirəsi, şagirdlərin müstəqil mütaliəsinin
istiqamətləndirilməsi üçün proqramda dərs saatları ayrılmışdır. Müstəqil oxu
üçün əsərlər şagirdlərin yazıçıların yaradıcılığı barədə təsəvvürünün zənginləşməsinə
kömək edir. Müəllim həmin əsərlərin mütaliə edilməsi, qavranılmasına müntəzəm
diqqət yetirməlidir. Bu məqsədlə proqram materiallarının müstəqil oxunmuş əsərlərlə əlaqələndirilməsi,
müqayisəsi, şagirdlərin mütaliə etdikləri əsərlər barədə qeydlər aparmasına
nəzarət, müzakirələr, disputlar faydalıdır.
Ədəbiyyat kursunda klassik
və çağdaş söz sənətimizin yüksək ideya-bədii dəyərə malik, şagirdlərin mənəvi
aləminin zənginləşməsində, estetik inkişafında, dünyagörüşünün genişlənməsində
əhəmiyyətli olan nümunələri, eləcə də xarici ölkələr ədəbiyyatından seçmələr
öyrənilir. Həmin əsərlər seçilərkən şagirdlərin yaş xüsusiyyətləri, maraq
dairəsi, gücçatan səviyyədə olması, gənc nəslin ədəbi təhsili, tərbiyəsi,
inkişafı vəzifələri də nəzərə alınmışdır.
“Ədəbiyyat” dərslikləri və
dərs vəsaitləri
Yeni nəsil “Ədəbiyyat” dərsliyi
və “Ədəbiyyat müntəxəbatı” dərs vəsaitlərinə məktəblilərin mənəvi-estetik tərbiyəsinin
daha da gücləndirilməsi, onlarda milli və ümumbəşəri dəyərlər, həyati bacarıqlar
formalaşdırılması baxımından əhəmiyyətli əsərlər daxil edilmişdir. Belə
ki, təlim materiallarının mövzu, problem və janr müxtəlifliyinə xüsusi diqqət yetirilmiş, dərsdə müzakirə və sinifdənxaric oxu
üçün vətənpərvərlik, məktəb, bilik, əmək, təbiətə məhəbbət, mənəvi saflıq və
s. mövzularda yüksək ideya-bədii dəyərə malik bədii əsərlər seçilmişdir.
Orta ümumtəhsil məktəblərində
2012/13-cü dərs ilindən etibarən kurikulum əsasında yazılmış yeni ədəbiyyat dərsliklərindən istifadə olunur[2].
V və VII siniflər üçün kurikulum
üzrə “Ədəbiyyat” dərsliklərini səciyyələndirən başlıca cəhətlər:
– Şagirdlərə milli və ümumbəşəri mənəvi dəyərlər aşılanmasına zəmin
yaradır, onların ədəbiyyata, mütaliəyə marağını gücləndirir, axtarıcılığa, tədqiqatçılıq
fəaliyyətinə, fərqli mənbələrdən yeni biliklər əldə etməyə sövq edir.
– Məntiqi, tənqidi, yaradıcı (bədii) təfəkkürü inkişaf etdirir.
– Tətbiqi xarakter daşımaqla zəruri həyati bacarıqların formalaşmasını
təmin edir.
– Fəndaxili və fənlərarası inteqrasiya imkanlarını reallaşdırmağa zəmin
yaradır.
– Fəal/interaktiv təlim şəraitinin yaradılmasını təmin edir.
– Şagirdlərin fərqli idraki imkanlarının nəzərə alınmasına şərait
yaradır.
Dərsliklərə
aşağıdakı tədris materialları daxil edilmişdir:
– Dərsliyin metodik strukturu, ondan istifadə qaydaları üzrə tövsiyələr;
– Azərbaycan və xarici ölkələrin şifahi və yazılı ədəbiyyat nümunələri;
– Əsərin məzmununun mənimsənilməsi və təhlili üçün sual və tapşırıqlar;
– Şifahi və yazılı nitqin inkişafı üçün sual və tapşırıqlar;
– Ədəbiyyat nəzəriyyəsi materialları;
– Ümumiləşdirmə və layihələr üzrə tapşırıqlar;
– Formativ və summativ qiymətləndirmə materialları;
– Yaradıcı tətbiqetmə, müxtəlif mənbələrdən istifadə ilə bağlı sual və
tapşırıqlar;
– Bədii mətnlərdə şagirdlərə tanış olmayan sözlərin lüğəti;
– Qısa ədəbiyyatşünaslıq lüğəti.
Dərsliklərə
daxil edilmiş bədii əsərlər aşağıdakı
meyarlar əsasında seçilmişdir:
– əsərin yüksək ideya-bədii dəyərə malik olması;
– şifahi və yazılı söz sənəti nümunələrinin janr, mövzu müxtəlifliyi,
aktual mənəvi-estetik problemləri əks etdirməsi;
– Azərbaycan ədəbiyyatı ilə yanaşı, dünya ədəbiyyatından seçmələrə
yer verilməsi;
– əsərin humanist istiqaməti, şagird şəxsiyyətinə müsbət təsiri;
– əsərin şagirdlərin inkişafı məqsədlərinə, maraq dairəsinə, yaş və
qavrama xüsusiyyətlərinə uyğun olması;
Bədii nümunələr seçilərkən mədəni-tarixi
ənənələrimiz, milli ədəbi təhsil sisteminin
zəngin təcrübəsi nəzərə alınmışdır. Seçilmiş bədii nümunələr vasitəsilə milli və ümumbəşəri mənəvi dəyərlər, vətənpərvərlik,
soykökünə bağlılıq, təbiətə qayğıkeş münasibət, insan hüquq və azadlıqları,
dini dəyərlər aşılanması imkanları diqqət mərkəzində saxlanılmışdır.
Dərsliklərdə kurikulum üzrə fənn
standartlarının tələblərinə uyğun olaraq ədəbiyyat
nəzəriyyəsi materialları (nağıl, təmsil, hekayə, epitet, bənzətmə və s.
haqqında məlumat) verilmişdir. Ədəbiyyat nəzəriyyəsi üzrə biliklərdən bədii əsərlərin
öyrənilməsi prosesində istifadə olunması, nəzəri biliklərin bədii mətnin məzmununun
öyrədilməsi və təhlili prosesində tətbiqi məqsədilə hər mövzu üzrə sual və
tapşırıqlar sistemi işlənilmişdir.
Təlimin
səmərəli təşkilində müəllim üçün istiqamətverici rol oynayan metodik vəsaitlərə
aşağıdakılar daxildir:
– Ədəbiyyat fənni üzrə məzmun standartlarının inteqrativ reallaşdırılması
cədvəli;
– Dərslikdə verilmiş təlim materiallarının illik və gündəlik
planlaşdırılması;
– Dərslərin müasir tələblər baxımından keçilməsi üzrə metodik tövsiyələr;
– Hər bir dərsin təlim məqsədləri, təlim standartları, fəndaxili və fənlərarası
inteqrasiya imkanları;
– Konkret mövzular üzrə dərslərin fəal/interaktiv metodlarla təşkili
texnologiyası;
– Formativ və summativ qiymətləndirmə materialları;
– Təlim prosesinin təşkilində variativliyi təmin etmək məqsədilə müəllim
üçün əlavə sual və tapşırıqlar sistemi.
– Şagird üçün əlavə oxu mənbələri və materiallarının siyahısı;
– İstifadə olunmuş materialların (resursların) siyahısı.
Metodik vəsaitlərdə
kurikulum üzrə dərslərin səmərəli təşkili ilə əlaqədar müəllimin fəaliyyətinin
başlıca istiqamətləri, onun yaradıcılıq və təşəbbüskarlığına imkan yaradan
vasitələr öz əksini tapmışdır. Vəsaitə daxil edilmiş yeni tipli dərs nümunələrində
fəal/interaktiv təlim imkanlarının, şagird-şagird, şagird – müəllim əməkdaşlığının
reallaşdırılması diqqət mərkəzində saxlanılmışdır. Bu məqsədlə ədəbiyyat dərslərində
bu və ya digər mövzunun tədrisi baxımından əhəmiyyətli olan fəal/interaktiv təlimin
üsullarına geniş yer verilib. Dərs nümunələrində ayrı-ayrı siniflərdə şagirdlərin
hazırlıq səviyyəsinin fərqli olması nəzərə alaraq təlim üsullarının və tapşırıqlarının
çoxvariantlılığı təmin edilib, konkret şəraitə uyğun olaraq müəllim üçün seçim
imkanları gözlənilib. Şübhəsiz, müəllim təqdim olunan dərs nümunələrinə ehkam
kimi yanaşmamalı, təklif olunan ideyalardan, metodik istiqamətlərdən
yaradıcılıqla bəhrələnməlidir. Metodik tövsiyələr işlənərkən belə bir cəhət əsas
götürülmüşdür ki, hər bir müəllim təqdim olunan yeni tipli dərs nümunələrindən,
dərslərin quruluşundan, metodik sistemindən çıxış edərək öz dərs nümunələrini
yarada və tətbiq edə bilər.
Təlim məqsədlərinin düzgün müəyyənləşdirilməsi kurikulumdakı məzmun standartlarının
reallaşdırılması baxımından müstəsna əhəmiyyətə malikdir. Təlim məqsədləri dərsdə
şagird nailiyyətlərinə aparan yoldur. Bu baxımdan hər ədəbiyyat dərsində hər
üç məzmun xəttini əhatə edən alt standartlara uyğun təlim məqsədlərinin müəyyənləşdirilməsi
diqqət mərkəzində saxlanılmışdır. Təlim məqsədlərinin yerinə yetirilməsi məzmun
standartlarının addım-addım reallaşdırılmasını, ilin sonunda isə gözlənilən təlim
nəticə-
lərinin əldə olunmasını təmin edir.
Təlim prosesində inklüzivliyin, differensial təlimin təmin olunması üçün şagirdlərin
qavrama səviyyəsinə uyğun bədii mətnlərdən, müxtəlif tipli – bərpaediici və
yaradıcı, sadə,orta, mürəkkəb tipli tapşırıqlardan istifadə olunmuş, metodik vəsaitdə
bunlardan konkret təlim şəraitinə uyğun istifadə ilə bağlı tövsiyələr, müxtəlif
variantlı dərs nümunələri verilmişdir.
Dərsliklərə əsərin təhlili
üçün “Oxuyun. Fikirləşin. Cavab verin” başlıqlı mətnlər daxil edilmişdir. Əvvəlki dərsliklərdə şagirdlərin bədii mətni müstəqil təhlil etmələrini
nəzərdə tutan, onlara istiqamət verən bölmələrin daxil edilməməsi təlim
prosesində ciddi problemlər yaradırdı. Bu mənada yeni dərsliklərə daxil edilən,
əsərin mövzusu, ideyası, obrazların xarakteri və s. təhlili üçün sual və tapşırıqlar
sistemindən ibarət mətnlər şagirdlərin əsərin ideya-bədii məzmununu müstəqil dərk
etməsi, təhlil bacarıqlarının formalaşdırılmasında əhəmiyyətli rol oynayır.
Şagirdlərin diqqətini
yazıçının bədii dil, üslub sənətkarlığına yönəldən, əsərdəki bədii gözəlliyin,
obrazlılığın başa düşülüb qiymətləndirilməsi ilə bağlı sual və tapşırıqlar da
dərsliklərin məziyyətini artıran cəhətlərdəndir.
İfadəli oxu ilə bağlı tapşırıqların dərsliklərə daxil edilməsi müsbət
dəyərləndirilməlidir. Doğrudur, əvvəlki dərsliklərdə də “Şeiri ifadəli
oxuyun” tipli tapşırıqlar vardı. Lakin ifadəli oxuya necə hazırlaşmaq, onu necə
həyata keçirmək barədə konkret istiqamətin, nümunələrin olmaması təcrübədə
həmin tələbin reallaşdırılmasına imkan vermirdi.
Dərsliklərdə ədəbiyyat nəzəriyyəsi
anlayışlarının sadə şəkildə izahı, konkret nümunələrlə aydınlaşdırılması da diqqəti
cəlb edir. «Müstəqil iş üçün», «Sinifdənxaric oxu üçün», «Ədəbiyyat nəzəriyyəsi»
başlıqlı bölmələr dərsliklərin metodik aparatını zənginləşdirmişdir. Bu
bölmələr şagirdlərin hər bir konkret mövzu üzrə bilik və bacarıqlarını dərinləşdirməyə
və genişləndirməyə imkan yaradır.
Hazırda məktəblərimizdə kurikulum üzrə dərsliklərlə yanaşı, VIII-XI
siniflər üçün ənənəvi «Ədəbiyyat» dərsliklərindən də istifadə olunur.
VIII-IX siniflər üçün «Ədəbiyyat» dərsliklərində görkəmli sənətkarların
yaradıcılığı nümunəsində ədəbiyyatımızın inkişaf yolu izlənilmiş, hər bir sənətkarın
həyatı və yaradıcılığı barədə yığcam məlumat verilmişdir. Yazıçının həyat və
yaradıcılığı barədə mətnlərdə onun yaradıcı şəxsiyyətinə maraq oyatmaq,
yuxarı siniflərdə öyrədiləcək oçerklər üçün zəmin yaratmaq niyyəti əsas götürülmüşdür.
Həmin dərsliklərdəki söz sənətinin
ideya-estetik təsirini gücləndirən bədii nümunələr vasitəsilə şagirdlər şifahi
və yazılı ədəbiyyat haqqında sistemli bilik və bacarıqlara yiyələnir. Bu məqsədlə
dərsliklərə metodik siqləti ilə seçilən «Əsərin
məzmunu ilə bağlı sual və tapşırıqlar», «Əsərin təhlilinə hazırlaşın», «İfadəli
oxuya hazırlaşın», «Müstəqil iş üçün», «Sinifdənxaric oxu üçün», «Ədəbiyat nəzəriyyəsi»
bölmələri daxil edilmişdir.
«Əsərin təhlilinə hazırlaşın»
mətnlərində məktəblilərə əsərin təhlili ilə əlaqədar konkret tövsiyələr
verilir, onların tədqiqatçılıq fəaliyyəti
istiqamətləndirilir. Müəlliflər yüksək ideya-bədii dəyərə malik əsərlərin öyrənilməsi
zamanı şagirdləri hər bir mətni onun ideya-məzmunu, ədəbi-bədii özəllikləri, sənətkarlıq
xüsusiyyətləri əsasında təhlil etməyə istiqamətləndirmək niyyətini əsas götürmüşlər.
Bu isə öz növbəsində məktəblilərin müstəqil mühakimə yürütmək qabiliyyətini,
bədii təfəkkürünü inkişaf etdirməyə, dünyagörüşünü genişləndirməyə, milli və
ümumbəşəri mənəvi dəyərləri mənimsəmələrinə imkan verir.
Dərslikdə hər bir mövzu ilə
əlaqədar verilmiş «Müstəqil iş üçün», «Sinifdənxaric oxu üçün», «Ədəbiyat nəzəriyyəsi»
bölmələri də şagirdlərin yaradıcı təlim fəaliyyətini səmərəli təşkil etmək
baxımından əhəmiyyətlidir.
«Ədəbiyyat» dərsliklərinin
metodik aparatı məktəbdə ədəbiyyatın öyrədilməsi prosesinin tərbiyə və təhsil
potensialını gücləndirir, müəllimi yeni təlim texnologiyalarından istifadəyə,
sadədən mürəkkəbə, müşahidədən ümumiləşdirməyə, analizdən sintezə keçməyə, ədəbi
təhsilin inkişafetdirici səciyyə daşımasına nail olmağa istiqamətləndirir.
Ənənəvi “Ədəbiyyat” dərslikləri
vaxtilə yeni pedaqoji təfəkkürün, metodik düşüncənin məhsulu kimi yaranmış,
istər ənənəvi metodikanın, istərsə də ədəbiyyat tədrisi metodikasının, ədəbiyyatşünaslığın
son nailiyyətlərini özündə ehtiva etmişdir. Şübhə yoxdur ki, orta məktəb
sınağından çıxmış ədəbiyyat dərsliklərindəki metodik sistemdən, orijinal
ideyalardan gələcəkdə kurikulum üzrə dərsliklərin tərtibi zamanı də yetərincə
istifadə olunacaqdır.
Ümumtəhsil məktəblərinin X-XI
sinifləri üçün «Ədəbiyyat» dərslikləri də şagirdlərin ədəbi təhsili, tərbiyəsi,
inkişafı vəzifələri, qavrama səviyyəsi nəzərə alınmaqla yazılmışdır. Ədəbi-tarixi prinsipə
əsaslanan bu dərsliklərdə ayrı-ayrı sənətkarların
həyat və yaradıcılığına həsr olunmuş ədəbi oçerklər, icmal mövzular verilmişdir.
X-XI siniflər üçün «Ədəbiyyat»
dərsliklərində monoqrafik şəkildə öyrənilən əsərlərin geniş təhlili verilməmişdir.
Bu zaman belə bir cəhət əsas götürülmüşdür ki, məktəblilər əsərin müzakirəsi
zamanı hazır hökmlərə, əzbərçiliyə deyil, bilavasitə əsərin mətninə əsaslanmalı,
müstəqil fikir söyləməli, öz hökmlərini əsaslandırmalıdır.
Ümumtəhsil məktəblərinin 10-cu sinfi üçün «Ədəbiyyat müntəxəbatı»nda
proqramın tələbinə uyğun olaraq, ədəbiyyatımızın
qədim dövrdən iyirminci əsrə qədərki mərhələsi əhatə olunmuş, hər bir sənətkarın
ayrıca öyrənilən əsərləri vəsaitə daxil edilmişdir. Bu zaman pedaqoji tələblər,
tədrisə ayrılan saatlar nəzərə alınaraq bəzi irihəcmli mətnlərdə zəruri ixtisarlar
aparılmışdır.
İcmal mövzular üzrə bədii nümunələr, əlavə oxu üçün
nəzərdə tutulmuş materiallar müntəxəbatda ulduz işarəsi ilə verilmişdir. Məktəbliləri
daha geniş müstəqil mütaliəyə cəlb etmək niyyəti güdən həmin əsərlərin ədəbiyyat
dərslərində geniş müzakirəsi, şeirlərin əzbər söylənilməsi tələb olunmur. Belə
ki, şagirdlər monoqrafik şəkildə öyrənilən əsərləri oxumaqla kifayətlənməməli,
müstəqil mütaliə vasitəsilə mövzu, problem, sənətkarın şəxsiyyəti, yaradıcılığı
barədə dərin bilik əldə etməyə çalışmalıdır.
XI sinfin
“Ədəbiyyat müntəxəbatı”na yeni və ən yeni dövr dövr Azərbaycan ədəbiyyatı üzrə əsərlər
daxil edilib. Bu sinifdə təlim materiallarının əsas hissəsini irihəcmli, mürəkkəb
əsərlər təşkil edir. Tərtibçi-müəlliflər bu cəhəti nəzərə alaraq dərslik- müntəxəbata
yalnız monoqrafik şəkildə öyrənilən bədii əsərləri daxil etmiş, bu yolla
şagirdlərin təlim yükünü ağırlaşdırmamağa çalışmışlar.
Dərslik – müntəxəbata ədəbiyyat
tariximizdə müstəsna xidmətləri ilə seçilən sənətkarların yaradıcılığı,
ayrıca öyrənilən əsərləri ilə bağlı materiallar, sual və tapşırıqlar sistemi şagirdlərin
ədəbi biliklərə dərindən yiyələnməsinə imkan verir.
Ədəbiyyat kurikulumu[3]
Müasir məktəbdə ədəbiyyat tədrisinə
yeni yanaşmanın mahiyyəti hazırlanan kurikulum sənədlərində öz əksini
tapmışdır. Ədəbiyyat kurikulumunun ümumi orta və tam orta təhsil pillələrində
qarşıya qoyduğu məqsəd və vəzifələr təlimə ənənəvi baxışın, metodik istiqamətin
dəyişdirilməsini qaçılmaz etmişdir.
Kurrikulum sözünün latınça mənası kurs, elm deməkdir. Bu
termindən 1876-cı ildən istifadə olunmağa başlanılıb. İlk fənn kurikulumları
isə 1918-ci ildə ABŞ-da meydana gəlmişdir. Azərbaycanda bu termindən keçən əsrin
90-cı illərindən etibarən istifadə olunur.
Kurikulum təlimin məqsədi, məzmunu, standartları, texnologiyalarını,
son məqsədə çatmağın yolları, vasitə və üsulları, həmçinin bu sahədəki fəaliyyətin
səmərəliliyini yoxlamağın metod və vasitələrini
özündə əks etdirən konseptual sənəddir.
Ədəbiyyat kurikulumunda
şagirdlərin ədəbi təhsilinin məzmununa
aşağıdakı tələblər verilir:
1. Ədəbi təhsilin məzmununu
şagirdlərin və cəmiyyətin tələbatına, dövlətin təhsil siyasətinə
uyğunlaşdırmaq;
2. Məzmunu nəticəyönümlülük,
şəxsiyyətyönümlülük, şagirdyönümlülük, inteqrativlik prinsipləri əsasında müəyyənləşdirmək;
3. Şagirdlərin təlim
marağını, potensial imkanlarını nəzərə almaqla onlara davamlı inkişaflarını təmin edən, müstəqil həyatda
lazım olan zəruri biliklərin və idraki, informativ-kommunikativ, psixomotor bacarıqların aşılanmasını təmin etmək;
Şəxsiyyətin inkişafına
dair yeni məqsədlər şagirddə məntiqi düşünmə, tənqidi yanaşma, müstəqil qərar qəbul
etmək, yaradıcı münasibət, bilikləri
müstəqil əldə etmək, praktik problemləri həll etmək kimi idraki bacarıqların
formalaşdırılmasını tələb edir.
4. Təhsilin
məzmununa şagirdlərin ümumi inkişafına xidmət etməyən, tətbiqi xarakterdə
olmayan, məzmunu ağırlaşdıran məlumat yönümlü məsələlərin daxil edilməsinə yol
verməmək.
“Azərbaycan Respublikasında
ümumi təhsilin milli kurikulumu” layihəsində ümumi və tam orta təhsil pillələrində
ədəbiyyat fənninin əsaslandırılması verilmiş, kursun əhəmiyyəti, məqsəd
və vəzifələri dəqiqləşdirilmişdir. Kurikulumda qeyd edilir ki, özünəməxsus
inkişaf yolu keçmiş, iki min ildən artıq yaşı olan Azərbaycan ədəbiyyatı dünya bədii mədəniyyəti
xəzinəsinə dəyərli sənət abidələri bəxş etmişdir. Humanist və demokratik
ideyaları parlaq şəkildə əks etdirən ədəbiyyatımızın ümumtəhsil məktəblərində
tədrisi milli dövlətçilik maraqları baxımından böyük əhəmiyyət kəsb edir. Məktəb
ədəbiyyat kursu həqiqi vətəndaşın və müasir dünyagörüşlü şəxsiyyətin yetişməsində
mühüm payı olan fənlərdəndir.
Kurikulumda qeyd edilir ki,
ümumtəhsil məktəblərində ədəbiyyat tədrisinin məqsədi yüksək ideya-bədii dəyərə malik söz sənəti
nümunələrinin öyrədilməsi əsasında şagirdlərdə müasir dünyagörüşü, estetik
zövq, mütaliə və həyati bacarıqların formalaşdırılması, onların ədəbi təhsil,
tərbiyə və inkişafının təmin edilməsi, gənc nəslin milli və bəşəri mənəvi dəyərlər
zəminində tərbiyə alması, şifahi və yazılı nitqinin inkişaf etdirilməsidir.
Bu məqsədə nail olmaq üçün:
- söz sənətinin mahiyyəti, daxili qanunları barədə zəruri təsəvvürlərin
yaradılması;
- milli ədəbiyyatımızın, eləcə də dünya ədəbiyyatından nümunələrin
öyrədilməsi əsasında milli və bəşəri dəyərlərin, həyati bacarıqların
formalaşdırılması;
-
şagirdlərin zəruri ədəbi-nəzəri biliklərə yiyələnməsi;
-
bədii əsərin oxusu, təhlili və qiymətləndirilməsi
üzrə zəruri bacarıqların yaradılması;
- ifadəli oxu bacarığının
formalaşdırılması;
-
şifahi və yazılı nitq bacarıqlarının aşılanması təmin
edilməlidir.
Azərbaycan ədəbiyyatının
tədrisi vasitəsilə:
Ümumi orta təhsil pilləsində incəsənətin bir növü kimi
söz sənətinin
– şifahi və yazılı ədəbiyyatın xalqın mənəvi sərvəti olması, həyatı,
taleyüklü məsələləri
özünəməxsus bədii vasitələrlə əks etdirməsi
barədə şagirdlərdə dolğun təsəvvür yaradılır.
Milli
və dünya ədəbiyyatından seçilmiş kamil sənət nümunələri vasitəsilə məktəblilərdə
sözə, söz sənətinə həssas, bədii-emosional münasibət formalaşdırılır, təhlil, dəyərləndirmə,
fikirlərini şifahi və yazılı çatdırmaq
bacarığı inkişaf etdirilir.
Ədəbiyyat
nəzəriyyəsi üzrə zəruri biliklərə və mütaliə mədəniyyətinə
yiyələnən şagirdlərdə konfliktlərə, problemlərə, ədəbi nailiyyətlərə
əsaslandırılmış münasibətin formalaşması təmin edilir.
Tam orta təhsil
pilləsində şagirdlərin
əsas təhsil pilləsində qazandıqları
bacarıq və vərdişlər təkmilləşdirilməklə tarixi-xronoloji ardıcıllıqla
Azərbaycan ədəbiyyatının çoxəsrlik inkişaf yolu, ədəbi ənənə və əlaqələri, Azərbaycan
və dünya ədəbiyyatının görkəmli ədəbi simalarının yaradıcılığından nümunələr
öyrənilir, ədəbiyyat nəzəriyyəsinə
dair məlumatlar genişləndirilir, məktəblilərin ədəbi-bədii, tənqidi təfəkkürünün
formalaşması təmin olunur.
Ədəbiyyat
kurikulumunun fənyönümlü deyil, şəxsiyyətyönümlü, nəticəyönümlü,
interaktiv, inteqrativ səciyyə daşıması, müəllim və şagirdin əməkdaşlığına əsaslanan
mahiyyəti, ümumi orta və tam orta təhsil pillələrində bu fənnin tədrisinin yeni
metodik sisteminin yaradılmasını zəruri edir. Təhsil prosesləri ilə bağlı bütün
fəaliyyətlərin səmərəli təşkilinə hərtərəfli
imkan yaradan bu sənəd ənənəvi təlim proqramı, tədris
planı, planlaşdırmadan köklü şəkildə fərqlənir.
Məlumdur ki, ədəbiyyat
proqramlarında tədris planındakı saatlara
uyğun olaraq konkret mövzular, bədii mətnlər müəyyənləşdirilir, hər mövzuya
ayrılan dərs saatları göstərilir. Kurikulum isə müəllimin
məzmun xətlərindən, təlim nəticələrindən, verilən metodik tövsiyələrdən,
nümunələrdən, konkret sinfin hazırlıq səviyyəsindən çıxış edərək mövzuları,
bədii mətnləri, bu və ya digər mövzuya ayrılan saatları müstəqil müəyyənləşdirməsinə
yol açır.
Ənənəvi fənn proqramlarının
elmi təmayülünə uyğun olaraq müəllim çalışır ki, şagirdlərə mümkün qədər çox
elmi bilik versin. Sanki hər bir şagird
gələcəkdə mütləq ədəbiyyatçı olmalı, bədii əsər yazmalıdır. Nəticədə ədəbiyyat
dərslərində şagirdin beyni həyatda ona lazım olmayacaq lüzumsuz bilik və məlumatla
yüklənir.
Ədəbiyyat kurikulumunda isə
şəxsiyyətə lazım olan həyati bacarıqların (bilik və idraki, sosial və praktik bacarıqlar) formalaşdırılması diqqət mərkəzində
saxlanılır, ümumi orta, tam orta təhsil pillələrində hər sinif üçün bu
bacarıqlar üzrə təlim nəticələri dəqiq göstərilir. Şəxsiyyətin inkişafına
dair yeni məqsədlər şagirddə məntiqi düşünmə, tənqidi yanaşma, müstəqil qərar
qəbul etmək, yaradıcı münasibət,
bilikləri müstəqil əldə etmək, praktik problemləri həll etmək kimi idraki
bacarıqların formalaşdırılmasını tələb edir.
Kurikulum sənədlərində şagirdlərdə mütaliə
bacarıqlarının formalaşdırılması mühüm vəzifə kimi qarşıya qoyulur. Bu, ədəbiyyat
müəlliminin fəaliyyətinin əsas istiqamətlərindən olub təlimin praktik yönümün
gücləndirilməsini təmin edir. Məlumdur ki, biliklərin mənimsənilməsi, onları fəal
tətbiq etməyə imkan verən bacarıqların formalaşdırılması şəxsiyyətin
yaradıcılıq imkanlarının aşkara çıxarılmasına və inkişaf etdirilməsinə, mənəvi-estetik
baxımdan zənginləşməsinə imkan yaradır.
Ədəbiyyat kurikulumunda
ümumi orta və tam orta təhsil pillələrində şagirdlərin hansı bacarıqlara yiyələnməli
olduğu dəqiq göstərilmişdir. Müəllim
məktəblilərin bilik və bacarıqlardan üzvi əlaqədə istifadə etməsinə xüsusi
diqqət yetirməli, mütaliə bacarıqları sinifdən-sinfə keçdikcə yeni, daha
mürəkkəb əsərlər üzərində tətbiq edilərək dərinləşdirilməlidir.
Məktəbdə bədii əsər
üzrə işin özünəməxsus strukturu, məntiqi ardıcıllığı vardır ki, bunlardan kurikulumda
da imtina etmək mümkün deyildir. Bədii mətnin oxusu, məzmununun mənimsənilməsi
(əsərin ilkin qavranılması, tanış olmayan söz və ifadələrin müəyyənləşdirilməsi,
mənasının aydınlaşdırılması, plan tərtibi, nağıletmə və s.) əsərin təhlili (mövzu, ideya, problem,
obrazlar baxımından təhlil və qiymətləndirilmə) üzrə bacarıqların
formalaşdırılması prosesində şagirdlərin yaş xüsusiyyətləri,
qavrama imkanları nəzərə alınmalıdır.
Məlumdur ki, şagirdlərin
mütaliə bacarıqlarına yiyələnməsi ədəbiyyata marağın artırılması, əsərdə
qaldırılan problemlərin, onun ideya-məzmununun, sənətkarlıq xüsusiyyətlərinin
qavranılması üçün zəruri şərtdir. Dərsə hazırlıq mərhələsində ədəbi-bədii nümunələr
üzrə iş planlaşdırilarkən hansı bacarıqlar üzrə iş aparılacağı dəqiqləşdirilir.
Məktəblilər dərsdə mətni mənimsəməklə yanaşı, mətn üzərində iş üsullarını öyrənir.
Mütaliə
bacarıqlarının formalaşdırılması üzrə iş bədii əsərin təhlili zamanı qarşıya
qoyulan vəzifələrin yerinə yetirilməsi
baxımından zəruridir. Mütaliə bacarıqlarına yiyələnən şagirdlər obrazların
xarakteri, davranışı, başqalarına münasibətində, qəhrəmanlara müəllif münasibətində,
yazıçı sənətkarlığında əvvəl nəzərdən qaçırdıqları yeni cəhətləri üzə
çıxarırlar. Nəzərə almaq lazımdır ki, adətən bədii təhlil zamanı bir yox, bir
neçə bacarığın formalaşdırılması üzrə iş aparılır.
Kurikulumda
hər sinifdə məktəblilərin hazırlıq səviyyəsinə uyğun
olaraq əsərin süjetindəki səbəb-nəticə əlaqələrinin, problem və konfliktlərin,
qəhrəmanların xarakterinin, hərəkət və davranışlarının, müəllif mövqeyinin,
sənətkarlıq xüsusiyyətlərinin müəyyənləşdirilməsi, onlara əsaslandırılmış
münasibət bildirilməsi üzrə bacarıqların formalaşdırılması ön plana çəkilir.
Kurikulumda bədii əsərin oxusu,
qavranılması, təhlili, şifahi və yazılı nitqin inkişafı üzrə bacarıqlar
varislik, ardıcıllıq, sadədən mürəkkəbə, asandan çətinə prinsipi gözlənilməklə
siniflər üzrə dəqiqləşdirilmiş, bölmələr üzrə yerləşdirilmişdir.
Ədəbiyyat
kurikulumunun mühüm xüsusiyyətlərindən biri burada ədəbiyyat təlimi
qarşısında qoyulan məqsəd və vəzifələr, ümumi orta və tam orta təhsil pilləsində
gözlənilən təlim nəticələri nəzərə alınmaqla məzmun xətlərinin müəyənləşdirilməsidir.
Ədəbiyyat fənni üzrə 3 məzmun xətti müəyyənləşdirilmişdir: 1. Ədəbiyyat
və həyat həqiqətləri; 2. Şifahi nitq; 3. Yazılı nitq.
Ədəbiyyat və həyat həqiqətləri məzmun xətti ümumi orta təhsil
pilləsində bədii ədəbiyyatda əksini tapan milli-bəşəri dəyərlərin, mənəvi-estetik
problemlərin qavranılması, təhlili, onlara əsaslandırılmış münasibətin
formalaşdırılması, mürəkkəb həyat hadisələrinin, ziddiyyətli situasiyaların
dərk edilməsinə və qiymətləndirilməsinə zəmin yaradır. Bədii həqiqətlə həyat
həqiqətlərinin müqayisəsi, əlaqələrin açıqlanması söz sənətinin mahiyyətinin
başa düşülməsinə, eləcə də insan həyatında, cəmiyyətdə müşahidə edilən mühüm
hadisələrin dərk edilib dəyərləndirilməsinə səbəb olur.
Söz sənəti olmaqla ədəbiyyatın
incəliklərinin, obrazların, bədii təsvir və ifadə vasitələrinin mənimsənilməsi
müxtəlif ədəbi növdə və janrda olan əsərlərin mütaliəsinə maraq oyadır, mətnin
ifadəli oxusu ilə bağlı bacarıqları inkişaf etdirir, şifahi və yazılı nitq üçün
zəruri olan lüğət ehtiyatını zənginləşdirir.
Ədəbiyyat
və həyat həqiqətləri məzmun xətti tam orta təhsil pilləsində ədəbiyyat
nümunələrinin öyrənilməsi, müxtəlif informasiya mənbələrindən seçilmiş
materialların mövzu, ideya, dil və üslub xüsusiyyətləri baxımından dəyərləndirilməsinə
imkan yaradır, informasiyaların faktlara əsaslanmaqla tənqidi
araşdırılmasını təmin edir, müxtəlif ədəbi növlərdə və janrlarda olan ədəbi əsərlərdəki
problem və konfliktlərin, ictimai-siyasi həyatdakı mühüm hadisələrin ümumbəşəri
və milli mənəvi dəyərlər baxımından qiymətləndirilməsi üçün əsas
olur.
Şifahi nitq məzmun xətti ümumi
orta təhsil pilləsində ədəbi nümunələrlə
bağlı fikirlərin obrazlı sözlərdən, bədii təsvir və ifadə vasitələrindən
istifadə etməklə aydın, ardıcıl, məqsədyönlü və yığcam ifadə edilməsinə imkan
yaradır.
Şifahi
nitq məzmun xətti tam orta təhsil pilləsində ədəbi əsərlərin məzmun və
ideyası ilə bağlı fakt və hadisələrə əsaslandırılmış münasibət bildirilməsini,
bədii-obrazlı ifadələrdən istifadə olunmasını təmin edir, müxtəlif mənbələrdən
toplanmış materiallara əsaslanmaqla müzakirələrdə ədəbi nailiyyətlərə müstəqil
münasibət bildirilməsinə imkan yaradır.
Yazılı nitq məzmun xətti
ümumi orta təhsil pilləsində mövzu,
problemlə bağlı müxtəlif mənbələrdən informasiyaların, fakt və dəlillərin
seçilməsini, ümumiləşdirilməsini, fikrin aydın, dəqiq çatdırılmasında
onlardan istifadə olunmasını təmin edir. Müxtəlif tipli (nəqli, təsviri,
mühakimə) və formalı (inşa, esse, hekayə) yazılara dair bacarıqların
formalaşmasına imkan yaradır.
Tam
orta təhsil pilləsində yazılı nitq məzmun xətti müxtəlif üslublarda
yazıların yazılmasını, görkəmli ədəbi şəxsiyyətlər, ədəbiyyat və mədəniyyət
sahəsindəki nailiyyətlər barədə təqdimatların hazırlanmasını təmin edir.
Kurikulumun həyata
keçirilməsi zamanı müəllim məzmun xətləri və standartlarınin şəxsiyyətin problemi həlletmə, mühakimə
yürütmə və əsaslandırma, təqdimetmə, tətbiqetmə, müqayisə, əlaqələndirmə və
s. fəaliyyət standartları ilə kəsişməsinə nail olmalıdır.
Kurikulumda
məzmun xəttinə uyğun olaraq hər sinifdə təlim standartlarının və nəticələrinin
müəyyənləşdirilməsi müəllimin istər ayrı-ayrı dərslərdə, istərsə də bütövlükdə
tədris ili ərzində öz fəaliyyətini məqsədyönlü qurmasına imkan verir. Müəllim
dərs ilinin sonunda hansı təlim nəticələrini əldə etməli olduğunu dəqiq
bildiyi üçün şagirdlərdə həmin təlim nəticələrinə uyğun bacarıqların formalaşdırılması
üzrə ardıcıl, sistemli iş aparır.
Milli
Kurikulum çərçivə sənədində “Ədəbiyyat” fənni üzrə ümumi orta və tam orta təhsil
pillələri üçün aşağıdakı ümumi təlim nəticələri müəyyən edilmişdir:
Ümumi orta təhsil pilləsi (V-IX siniflər) üzrə şagird:
- ədəbi-bədii nümunələri onların məzmunundan irəli gələn məna
çalarlarına uyğun ifadəli oxuyur, mətni bədii-emosional cəhətdən qüvvətləndirən
sözlərin mahiyyətini izah edir;
- yazılı
nitqində məzmuna uyğun üslub müəyyənləşdirir, orfoqrafiya və orfoepiya
qaydalarına əməl edir, söz ehtiyatından səmərəli istifadə edir, fikirlərini
ardıcıl və məntiqi ifadə edir, ümumiləşdirmələr aparır;
- ədəbi nümunələrlə bağlı fikirlərini aydın, ardıcıl, məqsədyönlü,
yığcam, yeri gəldikcə bədii təsvir vasitələrindən istifadə etməklə şərh edir;
- müxtəlif
janrlarda yazılmış mətnlər üzərində sərbəst işləyir, onlarda ifadə olunmuş əsas
ideyanı şərh edir, mətni məzmununa uyğun hissələrə ayırır və müvafiq plan tərtib
edir;
- şifahi və
yazılı ədəbiyyatın oxşar və fərqli cəhətlərini, xarakterik xüsusiyyətlərini
konkret nümunələrlə izah edir, öz fikirlərini müqayisələr aparmaqla əsaslandırır;
- ədəbi əsərləri
məzmun və ideya istiqamətinə, sənətkarlıq cəhətlərinə, obrazların səciyyəsinə
görə təhlil edir, öz şəxsi münasibətini, mülahizələrini bildirir;
- ədəbi əsərlərin
kollektiv müzakirəsi zamanı başqalarının fikrinə tolerant, obyektiv və ədalətli
münasibət göstərir, öz mülahizələrini əsaslandırır, ümumi rəyə gəlməyi
bacarır.
Tam orta təhsil
pilləsi (X-XI siniflər) üzrə şagird:
- oxuduğu ədəbi
nümunələri bədii-emosional və obrazlı qavradığını nümayiş etdirir;
- ayrı-ayrı
mövzulara dair müvafiq üslublarda yaradıcı xarakterli yazılar yazır;
- mövzu, süjet,
kompozisiya, bədii təsvir və ifadə vasitələrinin müəyyənləşdirilməsi baxımından
ədəbi nümunələr üzərində araşdırmalar aparır;
- ədəbi nümunələri
mövzu, janr, problem baxımından müqayisə edir, əsaslandırılmış rəy bildirir;
- ədəbi əsərin
məzmununa və ideyasına onun yarandığı dövrdə mövcud olan ictimai-siyasi və əxlaqi-etik
dəyərlər kontekstində qiymət verir;
- ədəbi
mövzulara aid tədbirlərin təşkilində iştirak edir, ədəbi nailiyyətlərə münasibət
bildirir;
- mənbələr üzərində
işləyir, görkəmli ədəbi şəxsiyyətlər, ədəbiyyat və mədəniyyət sahəsindəki
nailiyyətlər barədə materiallar toplayır, müxtəlif ədəbi mövzularda təqdimatlar
hazırlayır.
Ayrı-ayrı məzmun xətlərinin mahiyyətinin
kurikulumda aydınlaşdırılması müəllimə dərsdə müzakirə üçün ədəbi-bədii nümunələrin
seçilməsində müəyyən sərbəstlik verir. Kurikulum üzrə dərslərdə müzakirə üçün
bədii əsərlərin aşağıdakı meyarlar üzrə
seçilməsi məqsədəuyğundur:
-
əsərin yüksək ideya-bədii dəyərə malik
olması;
-
söz sənəti nümunələrinin janr, mövzu
müxtəlifliyi, aktual mənəvi-estetik problemləri əks etdirməsi;
-
Azərbaycan ədəbiyyatı ilə yanaşı, dünya
ədəbiyyatından seçmələrə yer verilməsi;
-
əsərin humanist istiqaməti, şagird şəxsiyyətinə
müsbət təsiri;
-
əsərin şagirdlərin inkişafı məqsədlərinə,
maraq dairəsinə, yaş və qavrama xüsusiyyətlərinə uyğun olması;
Bədii
nümunələr seçilərkən mədəni-tarixi ənənələrimiz nəzərə alınmalı, milli ədəbi təhsil sisteminin zəngin təcrübəsindən istifadə edilməlidir.
Ədəbiyyat
kurikulumunda qarşıya qoyulan təlim nəticələrinə nail olmaq üçün yalnız dərslik,
iş dəftəri, müəllim üçün metodik vəsait hazırlanması, nəşri kifayət deyildir.
İstər müəllim, istərsə də şagirdlər üçün bilavasitə ədəbiyyat təlimi ilə əlaqədar
elmi- metodik təminat, əlavə mənbələr, resurslar olmalıdır.
Ədəbiyyat fənni üzrə əlavə mənbələri (resursları) aşağıdaki kimi qruplaşdırmaq olar:
1.
Ədəbi ensiklopediyalar
2.
Ədəbiyyat üzrə məlumat, sorğu kitabları
3.
Ədəbiyyat lüğətləri
4.
Ədəbiyyatla bağlı elmi-kütləvi kitablar
5.
Zəngin kitabxana fondu (elektron
kitabxana, elektron dərsliklər daxil olmaqla)
6.
Məktəb elektron məsləhət xidməti
7.
Kompyuter proqramları ilə iş, internetə
çıxış, video çəkiliş, mətnin surətini çoxaltmaq imkanları və s.
8.
Ədəbiyyat kurikulumunun mahiyyətini, həyata
keçirilməsini izah edən, aydınlaşdıran metodik vəsaitlərin (müəllim üçün) hazırlanması,
nəşri.
Digər mühüm məqam öyrəniləcək bədii əsərlərin sayı
ilə bağlıdır. V-XI siniflər üçün ədəbiyyat proqramlarına onlarla lirik, epik,
dramatik əsər daxil edilmişdir. Kurikulum üzrə isə dərslərdə öyrənilən əsərlərin
kəmiyyət baxımından çox olması məqbul sayılmır. Əsas məsələ bədii əsərin ideya-bədii məzmununun dərindən
mənimsənilməsi, bu yolla mövzu, problem, əsərin sənətkarlıq xüsusiyyətləri,
ədəbi növ, janr barədə mükəmməl bilik əldə edilməsidir.
Kurikulumda ümumi orta təhsilin
(V-IX siniflər) icbariliyi nəzərə alınmışdır.
Bu, əsas götürülərək ümumi orta təhsil pilləsini bitirən şagirdlərin şifahi
xalq ədəbiyyatı, qədim və orta əsrlər, yeni dövr, ən yeni dövr ədəbiyyatından
seçmələri öyrənməsi, Azərbaycan ədəbiyyatının ümumi inkişaf yolu barədə biliklərə yiyələnməsinə imkan yaradılır. Ümumi
orta təhsilin VIII-IX siniflərində ədəbiyyatdan seçmələrin xronoloji ardıcıllıqla,
varisliyi gözləməklə öyrənilməsi təmin olunur.
Tam orta təhsil pilləsində təlimin təmayülləşməsi (humanitar, texniki, təbiət fənləri və s.) tələbi nəzərə alınaraq ədəbiyyatın
tarixi-ədəbi əsasda tədrisi, müxtəlif dövrlərdə
yaranan, ədəbi növ, janr baxımından fərqlənən, ayrı-ayrı ədəbi cərəyanlara məxsus
əsərlərin dərindən öyrənilməsi məqsədəuyğundur. Bu təhsil pilləsində təlim məqsədləri,
şagirdlərin yaş və bilik səviyyəsinə uyğun olaraq nisbətən irihəcmli, müasir
insanı düşündürən mürəkkəb problemləri, həyati konfliktləri, sosial
siyasi həyatdakı mühüm hadisələri, taleyüklü
məsələləri, milli və ümumbəşəri mənəvi dəyərləri yüksək sənətkarlıqla əks
etdirən əsərlərin öyrənilməsi vacib sayılır.
Həllini
gözləyən problemlərdən biri də sənətkarın tərcümeyi-halının öyrənilməsi ilə
bağlıdır. Kurikulum üzrə ədəbiyyat dərsliklərində sənətkarın tərcümeyi-halı
barədə faktların, rəqəmlərin, yer, şəxs, əsər adları ilə yüklənmiş mətnlərin
verilməsinə ehtiyac yoxdur. Kurikulum üzrə dərslərdə müəllimin yığcam təqdimatından
sonra sənətkarın yaradıcı şəxsiyyəti barədə zəruri məlumatları şagirdlərin
tövsiyə olunan müxtəlif mənbələrdən müstəqil
şəkildə toplaması, bu barədə çıxışlar, təqdimatlar hazırlaması daha faydalıdır.
Ədəbiyyat
1. Azərbaycan
Respublikasının Təhsil Qanunu. “Azərbaycan müəllimi”, 11 sentyabr, 2009 N 35 (8348).
2. Azərbaycan Respublikasında ümumi təhsilin milli
kurrikulumu. Bakı. 2006.
3. Azərbaycan Respublikasının ümumtəhsil məktəbləri üçün ədəbiyyat fənni
kurikulumu. V-XI siniflər. (Təlim Azərbaycan dilində olan məktəblər
üçün) “Azərb. müəllimi” qəzeti, 24 dek. 2010 N 50.
4. Ümumi təhsilin fənn standartları (I-XI siniflər) Bakı: Mütərcim,
2012.
5. Abbasov Ə. Yeni fənn kurikulumlarının səciyyəvi cəhətləri. Azərbaycan
məktəbi, 2007 №1, s.60-68.
6. Abbasov Ə.,
Balakişiyev Ş., Əliyeva B., Xudiyeva G., Süleymanova A., Azərbaycan dili və ədəbiyyat.
Metodika və təcrübə. Bakı: Orxan, 2005.
7. Cəfərov N., Araslı N., Hüseynoğlu S. Ədəbiyyat. 8-ci sinif üçün dərslik.
Bakı: Çaşıoğlu, 2006.
8. Cəfərov N., Kərimli T., Əsgərli Z., Bakıxanova A. Ədəbiyyat. 10-cu
sinif üçün dərslik. Bakı: Çaşıoğlu, 2005.
9. Cəfərov N., Həbibbəyli İ., Əiyeva N., Bakıxanova A. Ədəbiyyat.
11-ci sinif üçün dərslik. Bakı: Çaşıoğlu,
2004.
10. Cəfərov N.,
Əsgərli Z., Nəcəfov N., Həsənli B. Ədəbiyyat müntəxəbatı. 10-cu sinif üçün dərslik-müntəxəbat.
Bakı: Kövsər, 2009.
11. Cəfərov N., Nəcəfov N., Həsənli B.A. Ədəbiyyat müntəxəbatı. 11-ci sinif üçün müntəxəbat. Bakı: Kövsər, 2009.
12. Əhmədov C.M. Ədəbiyyatın
tədrisi metodikası. Bakı: BDU-nun nəşri, 1992.
13. Həsənli B.A. Ədəbiyyatın tədrisi
metodikası. Bakı: Bakınəşr, 2014.
14. Həsənli B.A., Nəcəfov N. Ədəbiyyat. 9-cu sinif üçün dərslik. Bakı:
Çaşıoğlu, 2009.
15. Həsənli B.A., Mustafayeva A., Hüseynoöğlu
S., Verdiyeva N. Ədəbiyyat. 9-cu sinif üçün dərslik. Bakı: Bakınəşr, 2016.
16.
Həsənli B., Hüseynoğlu S., Səfərova Ə., Quliyev Ə. Ədəbiyyat.
Müəllim üçün metodik vəsait.Bakı: Bakınəşr, 2016.
17. Həsənli B.A., Hüseynoğlu S., Quliyev Ə.Q. Ədəbiyyat. 6-cı sinif üçün dərslik. Bakı:
Çaşıoğlu, 2009.
18. Həsənli B., Hüseynoğlu S., Məmmədova S., Mustafayeva A. Ədəbiyyat. VII sinif.
Müəllim üçün metodik vəsait. Bakı: Bakınəşr, 2014.
19. Həsənli B., Hüseynoğlu S., Mustafayeva A., Verdiyeva N. Ədəbiyyat. VIII
sinif. Müəllim üçün metodik vəsait. Bakı: Bakınəşr, 2014.
20. Həsənli B., Mustafayeva A.,
Hüseynoğlu S., Verdiyeva N. Ədəbiyyat. IX
sinif. Müəllim üçün metodik vəsait. Bakı: Bakınəşr, 2014.
21.
Hüseynoğlu S.
Ədəbiyyat dərslərində yeni texnologiyalar: Fəal/ interaktiv təlim. Bakı, 2009.
22. Hüseynoğlu S., Həsənli B., Səfərova Ə., Quliyev Ə. Ədəbiyyat.
V sinif üçün dərslik. Bakı: Bakınəşr,2016.
23. Hüseynoğlu S., Həsənli B., Məmmədova S., Mustafayeva A. Ədəbiyyat.
VII sinif üçün dərslik. Bakı: Bakınəşr,2016.
24. Hüseynoğlu S., Həsənli B., Mustafayeva A., Verdiyeva N., Məmmədova S., Ədəbiyyat.
VIII sinif üçün dərslik. Bakı: Bakınəşr,
2014.
25.
Hüseynoğlu S., Həsənli B., Səfərova Ə., Quliyev Ə. Ədəbiyyat. Ümumtəhsil məktəblərinin
5-ci sinfi üçün dərslik. Bakı: Bakınəşr, 2016.
26. Quliyev Ə.Q., Hüseynoğlu S., Həsənli B.A. Ədəbiyyat fənnindən
metodik vəsait. Bakı, 2003.
27. Mikayılov Ş.A. Ədəbiyyat nəzəriyyəsi. 9-11-ci siniflər üçün dərs vəsaiti.
Bakı, 2003.
28. Muradov
B.H., Hacıyev A. C. Məktəb ədəbiyyat kursunun məzmunu və tədrisinin təşkili məsələləri.
Bakı, 1985.
29. Orta məktəbdə ədəbiyyat tədrisi. I hissə. A.M.Babayevin redaktəsi ilə.
Bakı, 1976.
30. Ümumtəhsil məktəblərinin V-XI sinifləri üçün ədəbiyyat proqramı. Bakı,
2003.
[1] Ümumtəhsil məktəblərinin V-XI sinifləri
üçün ədəbiyyat proqramı. Bakı, 2003. s. 3.
[2] Bax: Hüseynoğlu S., Həsənli B., Səfərova Ə., Quliyev Ə. Ədəbiyyat.
Ümumtəhsil məktəblərinin 5-ci sinfi üçün dərslik. Bakı: Bakı nəşriyyatı, 2012.
Həsənli B., Hüseynoğlu
S., Səfərova Ə., Quliyev Ə. Ədəbiyyat. 5-ci
sinif. Müəllim üçün metodik vəsait. Bakı: Bakı nəşriyyatı, 2012.
Hüseynoğlu S., Həsənli
B. və b. Ədəbiyyat. Ümumtəhsil məktəblərinin 7-ci sinfi üçün dərslik. Bakı: Bakı nəşriyyatı, 2014.
Həsənli B., Hüseynoğlu
S. və b. Ədəbiyyat. 7-ci sinif. Müəllim üçün metodik vəsait.
Bakı: Bakı nəşriyyatı, 2014.
[3] Kurikulumla bağlı məsələlər “Azərb. müəllimi” qəzetində
(24 dek. 2010 № 50) çap olunmuş “Azərbaycan Respublikasının ümumtəhsil məktəbləri
üçün ədəbiyyat fənni kurikulumu” əsasında şərh edilmişdir.
Комментариев нет:
Отправить комментарий